Kong Hee Fatt Choy

Lama enda nyenguk, tembu bejegau aku, tiga malam ke Kuching, enggau urang Business Summit. Bc betabi enggau aki Uban laban iya meri tanda pengingat ngagai wakil kempeni ke sponsor Summit. Betemu enggau mayuh bala pangan lama, rindu ga berandau, bekenangka utai. Bc jerita bini siku pemesai kena sakit ti disenakut, bc jerita bini pemesai siku bendar ngintu laki ke sakit, bc jerita YB ke kaung-kaung madahka pasal SCORE ke rumah panjai tang kitai di rumah panjai bengap2 enda nemu utai ku YB. Bc jerita allocation ba MP9 enda dipejalai enggau manah problem implementation etc etc..

Nya meh, kami be kong hee fatt choy laban bala anak bisi di rumah magang. Sudan datai kena 21 suba, Maie datai demalam. Tadi kami menyanak stocking on DVDs jerita tukis baru kena merindang ati maya chuti. Ka pulai ka Dijih enda ga ulih laban jalai ke bisi putus, tambah mega jalai ngagai rumah panjai kami naka iya penyai, enda ulih tengah kereta biasa. Nya meh buah sawit bala din nyentukka sawit ladang RH nyu dibuai ba tisi jalai laban enda ulih dianjung ngagai kilang ketegal jalai ke jai. Nya ku aku nganu apai Maie enti di Malaya din tama suratkabar jerita bakatu ku aku, laban urang tak muai duit ba menua kitai di Dijih, udah ga maya ekonomi merosot. Kasih bala ipar aku, nasit bisi mulong ditebang kena ngulihka belanja sekumbang ari ke jai & rega sawit turun.

Maya merarau tadi kami menyanak bendar amat ketawa ninga jerita Maie nusi bala patients iya. Misi meh ku urang nganggauka sida pharmacists, pia pin Mi ku iya, ukai tudah nemu utai ke bisi bida ku iya. Ga iya ku aku, ke beguna amat nuan ngelayan sida enggau manah. Gaga sida ku Maie kelebih agi sida ke tuai tuai urang Iban & urang ulu, laban silik utai dipadah. Ila ngiga dik aku endu enti aku berubat ku siku. Ari ni menua nuan endu ku siku. Ga ia endu, aku tu sakit ampus, kumbai dik endu kitai Iban ga sigi urang bumai, dini enda bendar gawa, ku siku. Kedua indai tuai and apai tuai urang ulu enda tentu nemu jaku Melayu, nya meh tusah amat madah utai ke sida. Tang sida selalu disempulang uchu, enti lelaki sigat-sigat Met, ku Maie madahka Sudan. Au neh, ku Sudan ila enti uchu sida enda enggau manah ka nuan ngelayan aki ini sida ngambika di tusika uchu sida ku Sudan nyadi batu api. Nya meh polis lalu bejagang ninga seduai bejaku munyi nya. Acah aja Mi ku urang nganu aku.

Mupuk dulu aku, urang nyu rauh-rauh mai aku meda Mamma Mia, tadi aku duduk din sida bara tinduk, muti Sudan ke dugau-dugau macha bup. Eh, umbas nuan blogging ku anak ke tuai, iya ke buban nya ba, kitu nuan ah enggau kami ngirup. Sudan mai mayuh bengkah keropok pulai, lalu keropok pisang sida nyamai amat gulai keju. Urang Indon sigi kreatif ngaga utai. Udah tu ka nemuai ngagai menyadi aku apai Sampai, iya nangi amat laban bukit ke semak taman sida di Jade Garden bisi runtuh, nangika rumah sida menyanak tak kena laban enda jauh ari kaki bukit.

Kong Hee Fatt Choy.