Tuesday, January 6, 2009

Enda Betah

Tu dua ari Maie & Sudan udah mulaika diri ngagai endur kereja/belajar, aku agi seilu-ilu ditinggalka seduai. Sekumbang ke chuti Krismas, tak 10 ari kami menyanak sewing-wing kin-kitu; berapi begulai, ngirup, makai begulai, meda TV, ninga lagu begulai, best amat maya ke berandau bejam-jam nunga pemakai. Tu seduai udah nadai di rumah tak sunyi amat, aku enggai tama ke bilik seduai, mua enda bisi seduai gali ba katil, ngujika bling bling, ngujika baju, macha bup. Agi tubah disium, agi tubah diberap tua dadi bala anak. Kadang-kadang nyadi "tingak" sida (munyi ku jaku sida agi mit suba), ngalika diri ba tengah-tengah tua dadi.

Aku enda nemu bakani enda asai ati indai urang bukai ditinggalka anak, kati bisih ai mata baka enggi aku kini. Enggi aku tak pun Maie nurun sekula ngagai Perth taun 2004 suba aku sigi udah enda betah. Tua dadi seminggu nganjung ia din, ia sida mula orientation tua dadi pulai. Ari college ngagai airport, tak bekerenjui ai mata aku nyaya. Bisi mendua minggu aku enda nyamai amat, upai Sudan agi bisi di rumah maya nya.

Udah nya Sudan ga ngejang. Bakanya tadi ga, ma tak seilu-ilu, tak nyaya ai mata aku enda betah. Kelebih agi laban iya ke sekula ba Jogja, nangi ka urang ke selalu nunjukka penggengai ati, nangika tanah berenyang, nangika penyelamat iya di menua urang. Mula Sudan kin, nyu tiap-tiap ari aku besembiang minta Tuhan nyaga ngemataka iya. Kedua aku sinu ka iya, laban bandar din mayuh pengurang kelebih agi ba utai di empa. Kasih ngingatka nyawa anak ke ka makai utai ke dikerinduka iya tang enda ulih laban kedai din nadai nyual tauka enti bisi, enda sebaka asai enggau ke ba ditu.

Ke ka endar tak begulai meh enggau bala anak. Ga maya sida tiga menyadi diasuh urang sekula ba boarding school berengkah ari Pom 1 tua dadi enda ngasuh, laban enggai beserara enggau sida maya sida agi biak, laban enti sida udah ngejang, lalu ngejang sida, muti pulai chuti. Dini enda, peda Maie, udah badu belajar nyu gawa di Miri, enda ga begulai ditu, semadi iya chuti.

Maya aku ke emo, apai Maie selalu nyebut ngagai aku, nama utai ulih bala anak enti besekukut enggau tua di Bintulu tu. Aku nemu sigi amat utai ku iya nya, tang kati ku enggau enti aku enda betah, sigi nyaya meh ai mata. Nya aku ingat amat ka indai aku maya aku mula ngejang ke rumah kelia. Aku sekula di Miri berengkah ari Pom 4 dataika Pom 6. Udah nya aku ke u. Tiap kali aku pulai ke sekula/ke u, nyabak belama indai aku. Nya aku ngaum indai, enda ngasuh iya nyabak. Bakatu ku indai aku nyaut: ila nuan ngasai, maya nuan udah bisi anak ila, maya anak nuan ninggalka nuan, sigi beraie nuan ila, ku indai aku. Amat utai ku urang tuai. Tu enda lama agi Igat ga mansang ke kolej, sigi mamau aku ke seminggu dua.......

3 comments:

Fabulously Sassy said...

HUGS!

-f-l-o- said...

Lama udah nadai nemuai kitu, sekali macha nyau asai ka pansut ai mata. :)

Sigi bakanya meh asai, ukai indai aja ngasai enda betah, anak pun baka nya meh, I'm sure you know that too.

Aku tiap kali ninggal ka Bintulu belajar/gawa suba, emo mimit aja. Tang maya aku nyau terbai kitu, nyau makin emo ga kami dua Mak aku. Hehe. Enti enggi iya, banjir airport Heathrow. Enti enggi aku, laban ka ngena mascara, ka kontrol mimit. Udah datai rumah baru rauh-rauh.

Har har har...

Indu Rumah Panjai said...

Hi endu Flo, ma ngenang bala anak ba menua urang, utai ke ngasuh kami gaga nya pemujur sida ia gawa, sekula enggau their happiness.

Arapka nuan gerai sereta lantang di Aberdeen dia.