Pemisi ke bali - Bagi ke 2

Pemayuh tubuh urang diau ba Bali bisi 3 juta lebih. 98% ari sida beragama Hindu lalu ke laluh urang Islam, Buddhist & Kristian. Sida rajin amat nyembah petara, nyau ka tiap buah rumah enggau kedai bisi kuil tauka altar endur sida ia ngayanka offering tiap-tiap pagi. Ketuai sembiang sida dikanggau ka "Pendeta". Aku nanya Pak Agung nama kebuah tiap iti patung altar enggau pun kayu kara (beringin ku sida tauka banyan tree) dibalut ngena kain kuning tauka kain check burak & chelum - dia iya madahka nya kena sida masa endur ke tuchi, nya kebuah disarung enggau kain. Pun kara tuchi laban pengudah sida mati (bangkai sida di tunu nitihka agama hindu), abu dibuai ke tasik. Udah nya abu deka nyadi embun, labuh ba pun kara. Nya kebuah pun kara tuchi, laban endur semengat ke udah angkat baru diau. Nya alai dalam timpoh seminggu udah mati sida ngambi 67 lambar daun kayu kara lalu digaga ke baka engkeramba mensia, lalu dibai ba dalam rumah. Tu nandaka semengat urang ke mati ke udah idup baru betukar nyadi element ai. Udah nya engkeramba di tunu, (nyadi element api) nya baru tembu pengawa sida ngintu pemati. Kami bisi mansa urang nganjung antu, begendang sida ia nganjung antu. Sida nadai crematorium baka kitai ditu, bangkai di tunu ba endur ti baka pendam.

Tu gambar kuil semak hotel endur kami diau. Nya bala penulong pendita. Tiap pagi sida nganjung offering - bungai, ruti di engkah ba daun ke di anyam lalu diidupka garu di engkah sebelah kaki lima (enti sida nadai altar) tauka ba altar sebelah kedai & rumah urang.
Tu ba Tanah Lot, endur temple semak tasik.
Tu kami raun ka meda tarian kecak, ngagai Uluwatu. Enda tau enda melitka kain kuning ba punggung di atur bala sida ke nyaga endur nya. Aku enggai melitka nya, nangi ke angka tak udah di pui kiri pui kanan, tang Pak Agung madahka aku anang takut, nadai jampi nya ku iya.

Kami meda tanda kecak, ngeluluka jerita ti besangkut paut enggau agama Hindu, ia nya jerita Ramayana & Sita.Tanda berengkah ari matai ari padam dataika malam.

Tu maya tanda ka berengkah. Utai ke ba baruh kaki sempun tu piring, tuai sembiang sida miring belama sebedau tanda berengkah. Sida nganggauka petara dulu, enggai ka dirasuk utai ti tau ngasuh sida enda ngeleda, pia ku Pak Agung nusi ke aku. Udah aku ninga utai munyi nya, di embal ga belakang pentas ke endur kami duduk tak bisi altar, nyau rengai-rengai bau garu, ia ga tak nyelinting penuduk kami tiga - ba belakang - aku lalu mantaika rosary, di engkah aku ba belakang Igat. Aku lalu besampi minta cover Jesus' Precious Blood. Dadi & Igat lalu "iga mami tu, takut amat". "Ish anang main-main, angka tak maya kitai lemi bulu, enggai tak di inggap utai sengapa" ku aku. Aku ingatka jerita bishop nusi indu di Miri ke kena rasuk utai udah bekau nemuai ngagai tua pek kong. Semadi di exorcise bishop baru iya gerai. Aiee chak.. enda aku beduli, sigi pengarap meh endur aku bepanggai. Udah aku besampi baru ati aku nyamai.

Indu ba tengah nya Sita, ia ke baju kuning jengkak-jengkak nya kijang emas. Sita rindu ka bayam kijang emas, nya iya ngasuh Rama nangkapka iya kijang nya. Tinggal Rama ngagai kijang, Riwana datai lalu nabanka Sita.

Gambar di baruh tu maya raja nyumbuh nulung Rama belaban enggau Riwana, ti ngujungka Riwanna alah & Rama mai Sita pulai. Nya kebuah enti kitai meda ukir kayu tauka utai ke dilukis sida mayuh amat gambar character ari jerita Ramayana tu. Ku urang, enti kitai nadai endur meda tiap iti tanda ba Bali, tanda kecak tu enda tau enda di peda. Bebaloi ga, aku rindu laban bisi jerita, ukai tak meda urang betanda pia aja.

Last afternoon kami din, kami nemuai ngagai Ubud, ia nya siti endur ti nyadi cultural centre sida. Mayuh amat kedai nyual kerja jari dia, kelebih agi kayu ke be ukir. Sekeda kedai & utai dijual sigi international standard, ia ga Bali sigi endur penemuai pupu raban bansa. Enti ba Jawa, sigi batik utai ke manah digaga din, tang di Bali sigi ukir, utai anyam. Mayuh patung Buddha enggau patung jerita Ramayana digaga sida. Maya kami ba Ubud, mayuh amat urang ba padang, benung belatih rally ila maya sida ka nunu bangkai raja Ubud ti udah mati 2 bulan tu kemari. Sida enda tau ditunu ngapa, nganti ari ti manah nitihka ditilik Pendita.

Ila nampung jerita aku baru. Lelak, baru datai ari KL lemai tu. Good nite.