Serumpu

Mai lauk Iban ah, ju ka kitai ngulam sayur, ku aku. Au, ku indai Linguh. Au, ku indai Tim. Pia munyi aum bala kami ke indu tengah ari tu tadi, bebai serumpu makai. Pulai ari upis tua dadi berumban-rumban nyendiaka utai, dadi meli itit panggang, aku lalu manggang jani, manduk buah entekai enggau nasak buah dabai. Peda bala datai sama ngemayuhnya ga mai lauk. Nya kami sebuat belauk buah lumuk, kaki jani, lulun ikan enseluai, upak lalis, kim chi, jani guring, petai, manuk enggau sayur champur, kelimpah ari lauk ti udah disediaka aku.

Lama kami sepangan enda beserumpu makai, taun siti tu kemari aku enda ulih enggau belama, semina apai Maie ke enggau sida. Tu bala pangan lama: apai Amoi, apai Tap, apai Tim, apai Boy enggau apai Linguh. Ia ke biak nya Mit, anak apai Boy.

Kami ke indu muka pak ke diri di bilik. Enda ganggam magang kami di peda kita? Violet (indai Amoi), Doris (indai Tap), Nuai (indai Linguh), Christina (indai Tim) enggau indai Maie. Chapoh bala betusi jerita, mayuh utai dikenang, jerita kami agi biak kelia maya baru masuk SIDS, jerita pengerai, jerita bala anak, indai Tap nusi uchu iya ke mit nemu sembiangka iya. Semua nusi diri udah berubah magang, mayuh gaya pengidup ti enda dikerinduka agi, laban ubah nyu udah tuai. Endang ke baka selama, sigi indai Tap meh ke ngasuh kami rangkai ngeli...

Tu sekeda utai di empa kami. Dini enda ganggam deh! Kirum salam ngagai sida aunty mami, pia ku Igat ke telipon benung kami ke richah. Au ku aku. Klaput yu, ku aku madahka sida. Bala lalu ketawa, laban maya agi mit suba Igat enda nemu nyebut "claypot", ma ka makai mi claypot ia lalu nyebut makai mi "klaput" kitai mi, ku ia. Nya nama nya lekat datai ka saritu!

Mupuk dulu, nyau ngantuk, tadi bedau ka tinduk ketegal udah ngirup kupi Hai Peng ke dibeli aku ari Kemaman. Aku bisi bejalai ka pengawa kin bulan dua belas suba, udah tembu miting di bai urang ngirup ba kopitiam ba tisi jalai, mai kami nyepi kupi ke tebilang din, kupi Hai Peng. Nyamai ku bala pangan aku....