Jerita Indai Ngelai

Demalam kami serumah ngiling bidai, kena ngetuka pengawa berami awakka bala di rumah berengkah gawa. Ta nama utai ti agi bisi, dibantaika kami magang. Kami ngirup kupi lalu bisi ga sida lelaki ke ngirup mimit. Kami nadai bemain, muti berandau enggau betusika jerita ti ngasuh ketawa.

Bakatu munyi sekeda jerita ti ditusi bala (sekeda jerita ke enda tau ditusi, ketegal iya bisi ngundan leka jaku ti kamah). Dua iti jerita tu ditusi indai Ngelai:-

Jerita meli agar-agar
Maya ka semak hari gawai, bini enggau bala anak siku tuai rumah mesan ngasuh iya meli agar-agar laban iya ka nurunka pasar Selangau.

Ani: Meli agar-agar nuan legi apai.

Apai Ani: Au. Ba bilik ni bisi nyual nya?

Ani: Eh tak tanya nuan aja meh, nemu China utai ku nuan.Tu gamal iya, baka tali pisang.

Apai Ani datai ba pasar. Iya enda ingatka nama utai ti diasuh anak iya beli iya. Asaika "luchang" nama utai nya ku iya.

Apai Ani: Tukay, bisi nyual luchang kita? (China Selangau nemu jaku Iban magang, sigi enda ngena jaku Melayu urang din laban bala Iban din ke tuai-tuai enda nemu jaku Melayu)

Tukay 1: Nama utai luchang nya?

Apai Ani: Ga ia luchang, luchang.

Tukay 1: Enda aku nemu utai ku nuan nya. Ngiga di bukai nuan.

Apai Ani: Bisi nyual luchang kita tukay?

Tukay 2: Nama heti utai luchang?

Apai Ani: Ga ia luchang, baka tali pisang gamal iya.

Tukay 2: Enda nemu aku utai ku nuan.

Apai Ani (ngagai kedai ke3), bakanya tadi ga tanya iya enggau saut China.

Apai Ani: Eh, baka tali pisang iya tukay. (Apai Ani lalu nengkadah katas, lalu tepedaka bungkus agar-agar digantung semak nya)

Apai Ani: Aa, tu meh ke luchang, utai tu.

Tukay 3: Oh, agar-agar nama utai nya, ukai luchang.

Jerita Nyumbuh Tunggal

Sekali indai enggau menyadi Indai Ngelai ke Sibu lalu nepan van sida serumah,begulai enggau sekeda sida ke indu. Siku ari indu ke enggau sida iya balu, udah mati laki. Ia sida datai ba Sibu sida bisi mansa upis perintah, lalu nyebut indai tuai ke balu tadi, munyi tu:-

Indai Tuai Balu: Kitu kami suba dibai urang niki ngisi pom, ba upis nyumbuh tunggal.

Ini Ngelai: Nama nyelai amat nama upis nya? Amat munyi nya nama ia?

Indai Tuai Balu: Ia meh, sigi upis nyumbuh tunggal ku urang ke mai kami.Semua kami nadai laki magang.

Ibu Ngelai: Eh, ukai nya nyumbuh tunggal. Pelaba aku ibu tunggal nya deh, ga semua kita ke enggau nadai laki magang.

Indai Tuai Balu: Ah, nya meh nama ia, ibu tunggal. Saru aku tadi, ukai nyumbuh tunggal.

Urang bukai ketawa magang.

Tu siti jerita di tusi sida - bisi indu siku ari Sg Anus nyebut bali nama pil peranchang nya "rachun ...." di sebut ia nama ikan nya... I leave it to your imagination to figure out the name of the fish...