Lelingut, Lelingai

Lelingut Apai Bakar

Gawai tu kemari kami menyanak bisi ngabang ngagai sida Apai Bakar, ba rumah panjai di ulu Dijih. Iya nya tanah aya apai Maie, lalu bini iya petunggal dua kali dadi. Nya meh tudah indai Bakar enggau menantu iya indai Cassie nyu kisuk ngenah ka kami pemakai. Pia Cassie riak-riak nyabak, enda tan angat lalu takut meda sekeda palan ba bilik dapur enda terang. Momok mami, pia ku Cassie. Kasih sida uchu, teleba diau nyamai di nengeri, enda nakal diau ba rumah panjai laban nadai karan kena masang aircon, injin api muti ulih musinka kipas. Nyu ke penyuah indai Bakar kelut-kelut mantaika pemakai, nya iya lalu nyebut ngagai apai Bakar. Salin lalu sadung ai nya apai Bakar, anang ta bara lelingut dia, pia ku uhang indu. Kami menyanak pin lalu engkikir ketawa ninga indai Bakar ngumbai laki iya lelingut. Tuchum kambin tudah apai Bakar, matak setan lalu nuang ai...

Lelingai Apai Maie

Aku lalu ngingatka apai Maie, lebih kurang baka apai Bakar nya meh maya nerima pengabang. Enti apai Bakar lelingut apai Maie lelingai, bepelawik patung nunga temuai. Puji Tuhan iya mayuh bala anak menyadi enggau menantu, bala menantu mantu aku bebantaika utai, sida ke lelaki nyadung ai enggau utai dempa. Apai Maie kala nusi ka kami menyanak jaku niang apai iya suba, enti ta semua mela, sapa ke makai legi, pia ku niang aki sa Maie. Au, sekira apai Maie nusi jaku apai iya ngambi aku ke enda bebai mela meh nya. Apu, enti aki labang, apai labang, enda alah ga Igat nunda ku aku. Aku lalu nangkap Igat, lalu madahka iya nuan anang bakanya ila Igat, enda tau enda nulung bini nuan, kelebih agi enti seduai sama gawa. Au Mi, ku tudah Igat. Ba aku, pia mega pelaba aku, ba mayuh kitai indu bukai, enda kitai ngiruh laki maya ari biasa, tang enti maya gawai, maya berami, kitai sigi begunaka tulung laki enggau anak. Semua tulang dipeguna magang, husband or not, tuan or not. Kati asai sida neh, enti kitai indu ta rendih-rendih, sebaka enggau sida ke bepelawik patung?

Lelingai di Kuala Lumpur
Tu aku nusi jerita diri empu. Ari lima tu kemari aku bisi ngulu aum di Kuala Lumpur, baru pulai lemai mari. Udah tembu baum, ngalih ari nya aku ngagai Sogo, lama amat udah enda kia, ka meda angka bisi gari ka chun ba mata, kena sembiang. Tudah diri enda tebai ka diri enggau urang bepisin iga ba pekayan, ngipak ka tubuh, ngipak ka umur, ngipak ka gamal ga kitai begari.

Aku ta asai ke bemimpi remban enti meda kitai indu ngena gari bekebelik maya siang ari, tau ke ngena gari ke sendat, nyu ngayanka gumpal isi. Pemadu ia enggai dipeda aku bala indu ke maya kami tu, tauka biak agi, ke ngena tanchut getah ke sendat, apu wai, amat ta pelimping gumpal pah enti kitai gemu. Pia ka nyu ayan sirang tanchut dalam laban tanchut nya ngempit. VPL (visible panty lines) nya a no-no ku urang ke pandai senentang adat basa begari. Ta pejam enchelak, pejam enchelak mata aku ma meda bala wai wai kitai Iban ba sebelah pasar maya ari minggu bepekayan bakanya.

Siti agi legging ke pandak, ba tengan betis aja, lalu kadang-kadang bisi ribin ba tisi. Ku aku bisi bagi urang ke tau ngena legging enggau ke enda. Enti urang tinggi, manah tubuh, ehem, urang ke biak meh, manah ga ngena legging, laban tubuh sida manah, lalu bisi shape datai ke baruh din. Tang enti tua gemu, isi nyu begumpal ba dada enggau punggung, di baruh aja ke mit agi, nyu baka katun spongebob enggau square pants kitai. Tambah ka enti t-shirt tauka baju kitai pandak, alamak, ayan sirang W ba belakang, ayan sirang V ba mua, terumbu ga tinggi, enti tanchut sendat amat nyu W meh ba mua ("camel's hoofs" ku sa Maie & Sudan madahka aku), .......pahai wai kitai nyu nyadi utai kena merindang ati uhang ke meda!!!

Nitihka utai ti dibacha enggau dipeda aku, adat kitai indu begari bakatu: lalai ka utai ti enda manah, kemas ka ba bagi tubuh ke manah. Enti berang kitai besai, anang ngena baju ke enda beberang, enggai ka nyu baka pemalu tawak lengan kitai, chukup enda manah. Pia mega enti kitai gemu, enda semesti iya kitai ngena gari ke balat begimbo, enggai ka ta nadai shape lalu. Umbas ia ga pengelunggar gari, chukup kena ngelalaika spare tyre enggau gumpal isi. Oso, anang ngena baju dalam ke sendat, enggai ke dipeda begumpal isi kitai ari belakang ma baju kitai fit. Gaya kitai begari pin tau ngasuh urang meragamka gaya pikir enggau pendiau kitai. Enti baju seksi, ngayanka sekeda buah labu, urang tau meragamka kitai nya bansa urang indu ke senang di ulih, dikuntik. It's about penampilan ku Melayu, bakani kitai begari, bakanya meh urang masa tauka enda masa kitai. Tambah kitai enda tau enda masa tubuh diri empu. Your body is the temple of the Holy Spirit ku Bup Kudus (1 Corinthians 6:19).

Au, pulai ngagai aku ke ka Sogo.

Nyadi ba Sogo, sida bisi ngadaka market segments ti bebida. Bisi gari ke manah kualiti sereta ngam ba urang ke ka begaya, tang rega ia mar agi. Pia mega bisi gari ke ngam ba urang ke enda tentu milih pisin, ditipak ka enggau rega ti murah agi, ulih di ibai ka urang mayuh. Nyadi aku tu ari market segment ke tengah-tengah, enggai meli utai mar, tang ka ke utai ti bisi kualiti. Siti pengelebih sida bisi ngadaka pisin ti chun ba aku, kain panjai, blaus pandak belengan panjai tauka tiga suku. Urang ke sama ngiga pisin bakanya sigi bala indu Melayu din, makcik-makcik baka aku....

Aku enda tetemuka utai ti di ke inginka ati, laban bisi pisin ti ngam ba aku tang kelalu balat ukir enggau churak - nyu genarau, betata batu ke seleka dua, pelaba aku laluh pisin Hari Raya. Andal amat aku ke kia, angka ta bulih sepasang dua ke umbas ia, ta lelingai kitai ngena baju baru neh, anang enti chun gamal.

Aku ke nurun ngagai Sogo nepan teksi churak gadung. Ka diambi ka bellboy teksi eksekutif ke biru- sida bellboy bisi diberi driba komisyen enti kitai ngena teksi nya - aku enggai laban mar bayar. Sida nya enda paham-paham ga ku ati aku din, kitai ke diau ba hotel mar bakanya (Grand Millenium) laban dibayar kempeni, ukai bayar diri empu, meda kitai ke diau dia kumbai ta mayuh duit kitai. Tambah mega kapa bangat mayar utai mar enti bisi ke murah. Nya aku minta tan ka sida teksi biasa. Datai teksi gadung aku lalu tama ninga bellboy madahka driba ka nganjung aku ke Sogo. Pakai meter kak, ku iya. Ok ku aku, lalu tama. Datai ba Sogo dipinta driba mayar RM20 lebih, peda aku meter amat nyampau nya. Aih deh deh, laban bara lelingai enda sedar ka diri ngambi teksi ke mar, bansa meter ke belanda...Ku jaku enggai bebayar mar, nyu mar ga bayar. Aku ke pulai muti RM10 lebih bayar aku laban ngena teksi mirah.

Nama kebuah aku tu ta ilap, enda meratika teksi nya tadi ku ati aku din, mutap ka diri empu. Nama kebuah aku ilap, laban bara lelingai, ngenang pemujur aum kami pagi nya, utai ti diperambuka kami udah dibantaika enggau manah ba urang ke ngaga pemutus, lalu udah dikemendarka urang. Nya alai laban aku ke nguluka market research sereta ngaga project proposal ti dibantaika bos besai kami, ta lelingai asai tudah diri...urang nadai pin muji kitai, tang kitai nemu meransang diri empu... enti enda pia enda ransing kitai ngereja pengawa....thank you ku urang, you are welcome ku kitai...lalu lelingut, lelingai kitai...