Igat pulai chuti beserimbai enggau taun baru China - iya datai ari lima suba lalu Maie pin sama pulai lemai nya. Aku sigi udah sedia manduk lauk ke dikerinduka seduai. Benung aku kiruk-kiruk bebela lemai nya, Igat lalu nukang ka pintu peti asi. Best amat tu Mi, mayuh amat utai di empa dibeli nuan. Paling best aku nemu tu enda nemu abis, laban sigi di isi nuan baru ma abis. Nti ba kolej din, ma muka peti ais berunding dulu aku, nanya diri empu, empa ka enda yogurt nya, tauka galau ka pagila, pia ku Igat. Ia lapa bakanya deh, ku aku. Ga ia Mi, mar amat meli utai di empa. Aku makai muesli ka breakfast, tang mar rega ku Igat. Aji la Bakir..... Oo, Igat, pia ku Dadi, enti pasal utai di empa agi ulih tupi tua Mami nuan, anang bangat ta ngenyadi makai, belanja bukai baru anang enda bejimat. Enda ga aku ngenyadi makai D, pia ku Igat, aku ngurangka diri makai utai laban ka nguruska diri, ku iya. Amat udah surut tubuh iya, bisi 5 kilo turun.Bisi seminggu sebedau iya pulai Igat telipun nusi diri bisi ngalu ngagai Allamanda Shopping Centre di Putrajaya. Mayuh amat biskut di jual sida dia ku iya, laban ka taun baru China. Nyu baka kuih kitai Iban ke begawai, pia ku Igat, bisi kuih sepit, bisi kuih chuan, bisi sarang semut. Iya ketenguk amat meda tart nanas. Nda meli nuan deh, ku aku. Mar amat Mi, ku ia, RM17 sebalang. Ee, sigi rega ia nya ku aku. Dah nya Maie nusi Igat bisi telipun nusi diri nyadi meli tart nanas, tang dikunsi sida 3 iku sekaban...Aji la Bakir. Igat nusi diri ketenguk ka makai kuih bakul. Nya alai tengan minggu tu kemari tua Dadi bebelika pemakai - tart nanas, kuih bakul, cheesecake, kuih sepit, bebelika lauk. Laban aku ke baru pulai ari Labuan minggu tu kemari, aku meli chocolate enggau biskut di bai pulai. Nya meh ti ngasuh Igat gaga.....
Udah makai lemai Dadi lalu mai kami hang out ba Reggae's Grill - siti endur makai ti happening amat - good ambience, kupi pin nyamai meh. Aku lalu nusi ngagai Maie utai ti disebut Igat pasal iya ke ngenyadi meli pemakai. Ee mami, ku Maie, peda nuan utai dikena iya, dia endur iya bebelanja...Aku lalu malik semak agi, peda jersey Man U - ori nya ku aku, au ku Igat, beli Met ka aku. Peda ke baruh, Crocs (hm aku enda tebeli ka diri Crocs chak, taja udah kereja, ku Maie nganu Igat).. Krismas suba mai beg sandik baru...baik ga bisi sale maya nya, nda mar rega beg... pulai ari raya suba meli headphone ti changgih, tua melaki bini laban ke enda beteknologi changgih enda beratika utai ti dikena Igat.. nemu di ku Maie, mar rega head phone Igat nya Mami. Di, di, ku ati ku din, tua apai iya meli head phone ke pengabis murah kena be Skype.. anak changgih... Di ajar meh nya, di asuh bejimat enggau duit, tang aku beratika angka laban iya baru kediri, baru pansut ari kerungan, nya alai iya agi gagit ka diri bebas ngaga pemilih. Ngarapka ma udah lama agi ila iya nda bakanya meh, nemu reti utai ti berega ukai semina ia ti manah dipeda aja tauka ia ke bejenama aja.. ...Taja pia iya discipline - aku ngirumka iya duit tiap bulan kena nambahka subsistence allowance ke diberi JPA, enda kala minta tambah iya. Bisi sekali iya bebelanja lebih, nyu suntuk amat nganti duit ka datai, tang iya enda minta kirum. Nama hal enda minta kirumka duit deh ku aku. Malu aku minta lebih Mi, pia ku iya. Hm, baik meh nya ku ati aku din, puji Tuhan.Kami menyanak pulai ke rumah panjai kemari, baru pulai ke Bintulu lemai tu. Dadi mai kami serumah gawa, nebas rumput ba pun sawit lalu nyarau dan sawit. Igat enggau apai iya gawa, seduai menyanak maja. Tua Maie mela pemakai.
Kasam ngut gulai daun kepayang, di peruk enggau beras ti udah diguring... Igat ketenguk ka makai kasam jani, bidik amat ga bisi urang nyual ngut ngagai rumah panjai kami kemari, nya alai lalu digaga ka kasam....
Pulai sembiang pagi tadi kami menyanak nyengguk tamu ba Selangau, untung amat aku tetemuka urang nyual upak bindang.... Tu lauk bala kami tengah ari tadi - begulai enggau bala ipar, bala anak, menantu, uchu, chapoh kami sebuat...
Meda Igat enda ulih enggau begawai ila (iya exam AS maya nya), Dadi lalu munuh siku jani ka dipanggang kami serumah de malam. Bala ke gawa di nengeri bisi pulai magang, nya alai kami serumah rami de malam, sama nguyas ka ngut....Sigi rindu begulai makai bebala mayuh, berandau, betanyaka berita...
Serumpu maya hari minggu - four generations ku Maie meda gambar tu - indai, menyadi aku, Maie enggau Ann. Sa menyadi aku selalu ba rumah panjai sida di Sepaduk, muti ari minggu baru sida bisi pulai ka rumah sida di bandar. Kami sama lelenggau ka pangan diri nya alai udah sembiang missa hari minggu tu kemari kami menyanak mai sida makai...
Maya kami makai tengah ari tadi, kami sebuat mayuh jerita ti ngasuh ketawa. Tuai rumah kami lalu nusi jerita niang aya sida suba, apai M ku kami, petunggal sekali dadi. Apai M enda serumah enggau kami, iya serumah enggau sida di ulu Dijih. Apai M suah nundi bini iya. Sekali seduai ke umai, nebas. Nya meh nyu telih isi tudah tuai kena babas laban tanchut panjai iya charik, tanchut dalam (kuntung) ti dikena iya pin sama charik ga, enggai enda chun-chun senentang utai iya ga ka charik. Muchau iya, lalu rauh-rauh nganggauka bini iya,...kitu di Indai M, ku iya, lalu bai duku..ee, nama nya, pia ku bini iya, gesah-gesah. Nya, peda nuan pala udun nya, pantap enggau, pia ku apai M. Indai M lalu muchau, pedis ati kediri dikeduan laki iya. Jehak (jerak) iya, pia ku apai M ke nusi jerita ngagai sida tuai rumah kami, keba iya buhuk (buruk) nyait tanchut aku, nyu chahik (charik) magang-magang...dini enda telih isi kitai kasak engkejuhu (engkejuru), pia ku apai M. Lekik-lekik kami ketawa...Nya neh, nya anang buhuk kitai ke bini nyait tanchut laki, enda alah ta dibantaika uhang utai.Tu siti agi ga jerita seduai iya, pia ku tuai rumah kami. Lebuh nyu ka semak hari gawai indai M ke pasar lalu ngaga buok. Iya meh datai di rumah nyu ka enda ngelala iya apai M, semadi nyu semak baru nemu nya ke bini diri empu. Oo, bajik amat bini aku deh, pia ku apai M, lalu dijeput iya kuyu bini iya. Indai M lalu ringat, bedawa ngagai tuai rumah, ngasuh tuai rumah ngukum laki iya laban laki iya ngemelika iya, ngumbai aku bajik iya, pia ku indai M. Ee, ku tuai rumah, aku enda nemu kati ku ngukum iya, laban nadai salah iya nyeput kuyu dik, iya laki dik, pia ga nadai salah iya ngumbai dik bajik, iya laki dik, ku tuai rumah.. nama deh...ringat meh tudah indai M tu tadi... Jugau endar ku aku, enda nemu ngena peluang. Uji ma laki nyeput kuyu, ngumbai kitai bajik, lalu tangkap enggau jari iya, nama ka dik ulu, pia ku kitai, ngambika urang betambah sayau....nda pia ku kita....selamat hari Valentine...
No comments:
Post a Comment