Saturday, December 5, 2009

Lengka tauka enda

Besadung ai tikah
Apin lama tu kemari tua melaki bini berandau ngenang atur pengawa maya kitai Iban melah pinang enggau ngintu pemati. Enda milih ba rumah panjai tauka ba nengeri, ma nikah, siti pengawa ti enda tau enda dikereja pengantin indu enggau lelaki, ia nya nyadung 'ai tikah' kenu ku kitai. Tuju tu manah, laban nya peluang seduai nabi tiap iku pengabang ke ngulu gawai tikah, pia mega urang ke datai meri selamat ngagai seduai. Tang utai ti enda berapa manah ba penemu aku nya besadung "ai tikah" laban ai nya disadung ngena siti gelas lalu semua urang ke dia bekunsika gelas siti nya aja. Nyampau wai nuntum utai ti udah ngundan liur mensia - enti 300 iku urang, 300 kali liur terengkah ba gelas. Kada enda sakit TB kedua, kada enda bisi hepatitis, kada enda bisi H1N1, tau ka penyakit bejangkit ke bukai. Keji amat aku, tang serba salah, enti enda ngirup nyu enda meri selamat ngagai urang ka nikah. Nya alai aku poh muangka gelas diri empu lalu ngasuh pengantin nyalinka ai ba gelas aku empu. Enda nyamai amat asai, gila enda dikumbai urang sumbung. Tang aku mikir, aku bertanggungjawabka pengerai diri empu, aku bisi kuasa ngereja utai ti patut kena ngintu pengerai diri. Pelaba aku atur ti bakanya tau dibuai, manah agi maya seduai ka ngirup champagne ba pentas begulai enggau apai indai semua pengabang sama nyeradakka ai diri empu. Pengantin agi ulih nabi temuai tang enda besadung arak. Kadang-kadang kasih ga aku meda, dini enda lelak tudah nyadung utai ngagai urang mayuh.

Main judi maya nyenggai urang mati
Apai Maie nusi sekeda rumah panjai ngemendarka urang bejudi maya nyenggai urang mati. Kenu ngambika urang enda tinduk, awakka sama bisi enggau sida sebilik ke empu pemati bejaga. Apai Sampai mega nusi ba menua sebengkah, mungkang niki bala China, sama enggau bejudi. Indu lelaki bejudi magang. Enda manah amat pengawa bakanya ba penemu aku. Ba maya tusah kitai nyu ngelantangka ati, nyu enda masa urang ke mati, urang ke empu pemati. Urang tusah kitai richah-richah bejudi. Nadai urang empu pemati nagang kitai tinduk, tang kitai enggai meh ta enda enggau bejaga. Nya meh tanggung pengawa tuai rumah enggau tuai-tuai rumah panjai, ngirit nembiak ngambi nyaup bejaga, nyaup mela, nyaup mutarka pengawa. Kitai ke nembiak mega sama betanggungjawab, enti kitai enggai diteju nguan bangkai bala diri empu, kitai anang nejuka urang nguan bangkai bala sida kediri.

Ngirup ai bisa maya nyenggai urang mati
Tu nyu udah nyadi siti pengawa ti enda tau enda maya nyenggai antu. Enti urang ke empu pemati enda meli ai bisa, kumbai lukek, mutap bala, ngumbai urang ke empu pemati nengelamka duit tulung. Kadang-kadang pulai, muchau, madahka nadai utai di empa, pia. Kala ngirup sampai mabuk bala sida ke lelaki. Kadang-kadang tak mayuh agi duit tulung kena meli arak, mimit aja kena meli lauk. Kadang-kadang nadai ungkup urang ke enda ngirup, laban enda dibelika ai kutak, tembu tak abis duit tulung kena meli arak. Aku enda lantang amat ati meda utai ti bakanya, laban nya pengawa tusah, ukai pengerami. Enti pengerami baru kitai ngirup ai bisa, enti maya tusah kupi enggau teh nya meh di irup. Uji belika pemakai bukai enda manah agi. Minggu tu tadi maya ke bekenangka pekara nya, Maie lalu nyebut, Mami, enti kita udah diambi Tuhan ila, enda kami menyadi meli ai bisa Mi, ku Maie. Au anak ku aku, anang meli. Pangan ke amat, ke kasih, ke sinu tetap deka nyenggai kitai taja nadai ai bisa. Enti pengeka kitai nyenggai urang bepanggai ba pemisi ai bisa, manah amat kitai ngabas ati diri, nanya ka tuju kitai ke ngulu pemati. Kitai ngulu pemati kena ngenataika penyinu, kena merindang ati sida sebilik ke tinggang pemati, kena masa iya ke mati. Nadai urang mesanka kitai mai nyenggai ketegal bisi ai bisa diirup. Ba senentang tu, tau amat bala tuai rumah enggau JKK ngaga atur ngubah penyakit ti bakatu. Aku nemu sigi tusah amat ngubah utai ti nyu udah nyadi baka tradisi, tang enti iya digaga enggau aum, enggau pakat, tentu ia ulih gaga.







No comments: