Kediri

Rumah sunyi, nadai ninga utai engkeretik. Maie nyau makai lemai enggau pangan iya. Apai Maie nyau ngagai rumah anak petunggal iya, laban sida sekaban bisi utai dikerandau. Aku enggai dibai iya, enda poh jenggu-jenggu ninga sida berandauka temuda, tambah aku ka rileks, udah bekau ke mela saritu tadi. Aku ngajar bible study ba Sunday school nya alai ma udah tembu sembiang missa sigi berumban belama ngirup enggaika laun tama kelas, kelas berengkah jam 9.45 pagi ngagai 10.45 pagi. Pulai ngajar, aku lalu guai-guai manduk lauk. Laban saritu ari pengada Maie, kami tiga ngintu di rumah - makai tengah ari, laban malam Maie keluar enggau pangan iya makai. Nya alai aku manduk lauk nitihka utai ke ka di empa iya - manduk kari pala ikan stail tambi, manggang babi, manduk daun entimum gulai buah entekai enggau tubu undang, sereta ngukus ikan garupa mirah. Tinggi tungku aku, munyi ku urang tuai, nyau pukul 1.15 ngalih ari baru kami tiga makai. Enda lebu ga aku, bendar seduai mapai makai. Tembu makai aku lalu ngaga bubur kasak laban Apai Maie agi belala makai bubur minggu siti tu kemari. Aku tembu kiruk-kiruk di dapur jam 2.30 lemai, nyau pukul 3 baru ulih gali. Amat aku lelak tang aku puas ati laban dadi enggau Maie gaga makai utai dipanduk aku.

Lemai tu aku ka nemuai ngagai sida indai tang sida nadai dia, nyau pulai ke rumah panjai. Tadi tua Maie ngagai sida indai Muntai nganjung bubur, nadai ga urang dia, muti ama sida ke bisi. Pulai ke rumah kiruk-kiruk baru ngaga jus - enda ibuh makai lemai tua ku Apai Maie, makai buah aja, udah kenyang makai bubur...tak cakap awal bang, saya dah goreng changkuk ku aku......nama deh, ta di empa apai Maie pia meh changkuk nya tadi. Diatu aku nyadi Uging, ngirup kupi enggau makai ruti sebayan sambil blogging ....ga aku kediri di rumah, nadai laki, nadai anak, nadai indai, nadai madi...

Aku enda nyamai amat ditinggalka Igat ke udah nurun belajar di KL. Ma aku udah enda betah, sigi keberai ai mata aku nyaya ngenang Igat, pia ngenang Sudan ke benung summer program di Budapest. Ta tiap ari aku besampi minta Tuhan nyaga, ngemataka bala anak. Ga indai aku nundi aku, lelak Tuhan ninga nuan Yang, nyau besampi belama, ku indai. Uum, ngerara aku, ia ta dua kali lima tua iya. Indai aku tumu belama dani pagi, jam 4.30 sigi udah angkat. Iya lalu sembiang rosary, sampai abis 15 dekad sekali sembiang. Sigi besampi meh iya ke bala kami menyadi, bala menantu enggau bala uchu ichit. Iya kala madahka aku iya minta Tuhan meri pengering ngagai iya, awakka iya ulih nerapi penguji ari ke mela bala ichit. Taja iya lelak mela bala ichit, iya bisi pengelantang. Bakanya meh pemanah Allah Taala, ma kitai ngereja peneka Iya, Iya sigi mantu kitai, sereta Iya enda ngelakka kitai diuji ngelui ari ti enda ulih tatka kitai. Puji Tuhan.

Pagi tadi Igat nusi diri masu gari iya, nusi diri makai oat enggau buah anggur ke breakfast, keberai ai mata aku. Ngalih ari tadi sms ga Igat, nanyaka pengawa kami. Benung makai bubur ku aku, keberai baru ga ai mata aku. Oh, kelalu nuan ku apai Maie, nama utai disabakka bala anak, senang Igat din. Lemai tu tadi Igat nusi sida sembiang missa ba chapel di Nilai, kolej sida bisi nyendiaka bas kena nganjung sida sembiang. Lantang ati aku ninga nya, nadai utai dikirauka aku senentang kini enggau sapa urang enggau iya sembiang agi.

Sudan hapi amat munyi (kati ke enda deh mami, pia ku Maie, chuti Met nya din, dini enda hapi) gaga iya nusi diri nyau ka tiap ari meda bala lutor mutung urang, lalu ari lima tu kemari iya dikemendarka lutor nulung muka jait (sutures), seronok ku iya. Hmm, manah meh enti nuan seronok ku aku, reti nya nuan milih the right course ku aku. Enti malam happening amat kami ditu mami, dibai urang keluar belama, ku Sudan. Eh jimat ku aku, anang enda nemu nyaga diri, ai irup anang enda nyaga enda alah ta disimpanka urang utai sengapa. Au mami, pia ku Sudan. Raun kitu seduai dadi, ku Sudan, manah amat Budapest..Umm, enda dalam list menua ke ka dilawa aku nya.....