Sunday, April 26, 2009

Aku deka ngunsai kita ngena ai ti beresi......Esekiel 36:25

"Aku deka ngunsai kita ngena ai ti beresi, ngambika kita tuchi ari semua engkeramba kita enggau ari semua utai bukai ti udah ngamah kita.
Aku deka meri kita ati ti baru, lalu meri roh ti baru ngagai kita.
Aku deka muai ati kita ti baka batu lalu meri kita ati ti ngasi.
Aku deka ngiri Roh Kudus ngagai kita, lalu netapka kita nitihkan adat sereta ngingatka semua pesan ti diberi aku ngagai kita.
Nya baru kita deka diau ba menua ti diberi ka aki ini kita.
Lalu deka nyadi anembiak aku, lalu aku nyadi Allah Taala kita."
(Esekiel 36:25-28)

Pia ku bacha keterubah ba sembiang missa ti diadaka kena meri Sakramen Baptisa enggau Sakramen Sabung Jadi ti di atur ba rumah panjai kami kena 25 April kemari. Ari tu meh ti udah dianti aku ngelamatu, ari endur Allah Taala ngunsai kami serumah ke baru nemu pengerindu Iya enggau ai ti tuchi nengah sakramen baptisa. Lapan taun kami udah nirika rumah panjai, lalu sarinya Allah Taala netapka maya ti patut endur Iya nunjukka pengasih ngagai kami serumah. 30 iku urang besai tuai enggau 17 iku anembiak mit dibaptisa lalu ditangkanka sakramen sabung jadi 10 pasang pengantin. Sida sigi udah di ajar dulu, tang sebedau dibaptisa sida diberi kursus 2 ari (ari 23 & 24 hb April) udah nya dibaptisa kena 25 April. Tu bala catechumen begambar bebala mayuh begulai enggau Fr Connors, catechist Barnabas Minggat enggau tuai sembiang Dominic Nibang.
Pengawa ke terubah, ngunsut chrism oil ba semua catechumen. Tu uchu Jemai. Iya ngambi nama kristin "Helen".

Pengawa ti kedua, masu pala. Ukai nama saint Maxwell nya, ku Fr Connors, gigaka nama Kristin iya tu, ku Father. Nya sida Indai Kumo enggau Ngayan "hangap-hangap"berundingka nama, aku lalu jampat nyebut "Peter nama iya", nya baru Father masu pala Suil (tanah uchu)...
Tu catechumen ke pengabis tuai, nama iya Ana.. Hm, ba bup kudus (Lukas 2:36-38), Ana ke diambi iya nama nabi indu ke enda pulai ari rumah sembiang, sembiang belama udah iya nyadi balu.. iya bisi ba rumah sembiang maya Saint Josep enggau Indai Maria ngenjuk Jesus ba rumah sembiang...Arapka ipar aku Ana tu neladan nabi Ana ke diambi iya nama..

Pengawa ti ketiga, sakramen sabung jadi melaki bini. Tu wat runggu ensing, William Lua, anak menyadi apai Maie. Bini ia indai Kubu ngambi nama Roselind. Malam nya seduai munuh babi berami...anak udah 4 iku...Puji Tuhan!

Au, tua Igat lekik-lekik ketawa malam sebedau sida dibaptisa, ninga ajar cateckist Simon Luha. Catechist ngajar sida senentang sepuluh iti ajar ngintu kaul melaki bini. Udah nya ia nerangka bakani atur sida disabung jadi pagila. Ku catechist, udah kita disabung jadi kita besium. Nemu besium kita? Ketawa bala. Ee, ku Catechist, suba kami begulai enggau Fr Bos, udah urang disabung jadi, Father Bos ngasuh sida besium, sida semina nyatupka pala ba pangan diri. Apu, ku Apai Bos, lain amat kita Iban besium, besatup pala aja, nyu baka kambin....he he he..chun amat utai ke disema ke Father Bos, he he he...

Tu catechumen ke amat bebendar belajar....nama iya Beruang, nya alai dikanggauka kami Jugam. Iya petunggal sekali apai Maie, jadi enggau menyadi indu apai Maie. Iya nitihka urang dalam semua pengawa, tang sekalitu udah bekau Tuhan merekat iya enggau pengarap (graced him with faith) ia nyulut agi ari urang, beamat-amat belajar sembiang, nyentukka maya nungku padi iya megai bup catechism ba jari sepiak, kaki ngindik, mulut kuchau-kuchau macha, ngingatka sembiang "Aku Arap".. Iya ngambi nama John. Bini iya enggau anak iya enda pass test, nya alai enda nyadi enggau bebasu pala, dudi seduai ila, nganti seduai udah nemu nyaut semua tanya catechism baru dibaptisa...Hm, aku perlu ngajar iya maya aku pulai ujung minggu ila.

Aku rindu ninga sida ngajar pangan diri leka sembiang...enggaika enda pass di test apai Connors. Kedua tiga kali test baru pass, nyu ka enda pass da...Nyala ngerak indai Pawa jam 1.30 pagi, minta ajar sembiang Ngesal Ati... Iya ngelamatu belajar leka sembiang bukai, enda belajarka nya laban indai Pawa enda madahka iya senentang sembiang nya... indai Pawa enggau bala anak iya udah bebasu pala suba, Nyala aja bedau laban ke gawa di Kuching....Nyala ngambi nama Boniface..

Apu, uchu, anang nyabak, tua sama ngambi nama Saint Rita, indu bagas mela Allah Taala....Tu uchu, indai ia Gloria Gulang, anak menyadi apai Maie...Semua sida menyanak dibaptisa, Gloria urang keterubah ia pass test.. Apai Thomas ngambi nama Nicholas...

Tu bala sida Michael Merayang menyanak, anak menyadi Apai Maie. Ke benung dibaptisanya Julia, ke suah nyulu aku maya aku mela...Tuai rumah William Bansa enggau bini iya nyadi godparents semua sida ia..
Tu Julian Kiroh sebilik, menyadi Ir Jawan. Gaga amat sida sebilik udah dibaptisa..anak ia ke biak Angelina ruik-ruik ka enggau sunday school ngelamatu tang enda dianjung laban sida bedau bebasu pala.. Puji Tuhan, awakka pengarap sida ti mesai leka ensabi tau tumbuh enggau galak..amin.


Tu uchu Unau, iya ngambi nama Boniface. Oo ku aku, iga seduai Nyala bekunsika nama nya, mayuh nama saint bukai deh. Eh ini, ku iya, aku rinduka nama nya, nyamai disebut ku iya. Au, enti nuan rindu nadai ngawa meh ku aku. Iya lalu nusi ia tusah amat ka ngingatka leka sembiang Aku Arap, berapa kali seduai iya melaki bini belajar, tak salah belama. Nya iya mansang test ba Father, nyu kesal dia, peluh dia, pahai enti aku tu enda pass legi ku iya.. Tang iya meh udah nyebut leka sembiang, tak nadai salah leka ini, tak mujur magang, tak nyebut penyebut aku.. "pass nuan" ku Apai Connors. Gaga amat aku ini ku iya. Eh, Roh Kudus nya uchu, ku aku, nulung nuan ngingatka ajar ngambi nuan nemu nyebut leka sembiang.

Tu uchu Ensinggan, iya udah dibaptisa maya sekula suba, tu iya nguluka laki enggau bala anak iya...Pia meh, ku Saint Paul, awakka laki tauka bini ke enda arapka Jesus nyadi tau arap ari begulai enggau bini tauka laki ke arap... Laki uchu Ensinggan kesal amat maya iya nyendiaka diri muai penyalah, nyu tepeluh-peluhka diri nganti gintir diri empu...tuchum aku ninga jerita sida.Udah baptisa, sida nerima dian tanda penampak Kristus.Sida udah besumpah nerima, nitihka penampak Kristus lalu ninggalka pemetang dosa. Tu John, serious amat gamal iya. Aku ke bediri semak Igat ke nyuaka dian ngagai sida nyu nyeregu maya meda sida dibaptisa.
Umai besai, tang pengetau mimit amat..nya alai pinta ngagai Allah Taala, awakka numbuhka kanggau ba bala anembiak nyadi pengetau ba umai Iya! Enda ga aku give up ka Igat, aku besampi awakka Allah Taala meri Iya penemu ulih meretika peneka Allah Taala ba pengidup Iya. Bak ku akak aku Jacinta, se agi Igat Belayong kami bedau bebini, se agi akak aku enda putus asa..hmm pia meh wai madi, tua ke sembiang sembiang meh, bala anak bujang tua ke ka be awek be awek meh.. Indai Jill enda memunyi, angka Nico enda be awek kini..

Catechist Barnabas enggau tuai Dominic

Ketuai ngetau, gali ba ruai nganti ke berengkah baru udah makai tengah ari... Father Connor bejaku munyi jaku urang bagi ke dua, "kati ku aku ulih masu palo iyo, iyo enda nemu utai ke ditanyo aku" ku iya nusi ke kami maya makai tengah ari..

Apai Maie nyuaka sagu ati ngagai Father Connors, ngarika kami serumah.

Aku nyadi tukang masak, mela Father enggau bala ke nulung iya ngajar laban sida iya makai ba bilik aku. Pukul 4.30 pagi udah dani aku nyendiaka pemakai pagi sida, udah nya nyendiaka ngirup pukul 10 pagi, makai tengah ari, ngirup lemai enggau makai lemai. Chuti tua apai Maie ngambi ulih mela sida, meri sukong ke kami serumah. Aku semina ulih enggau sida sembiang pagi enggau sembiang missa. Pagi sida ka baptisa, aku nguluka sida muji enggau nyembah. Nyaya ai mata aku laban ngenang pemadas Tuhan ke udah merekat kami serumah enggau pengarap. Puji Tuhan!

Ngirup pagi ba cafe indai Maie.



Tu uchu Moses, kisuk amat, enda iya nulung aku mela deh, tembu tak ke ruai ke bilik main iya besari-sari. Ma indai ia nibarka jari nulung aku nutuk bawang, ia ruik-ruik nyabak. Tu nyu pengambis kisuk iya, nya nyu nelanjaika diri...

Au, tu pengawa sulu aku, sigi enda ngelepaska peluang, iya mai abang iya (menyadi iya udah baptisa suba) nembuka setor baja. Kelut-kelut meh iya, ia maya taim enggau merarau, iya mai sida Father tama kebilik udah nya iya sibuk ngereja pengawa dunya munyi ku iya (tahu pun) Sebedau aku meda setor ia, se agi nya ia ngasuh aku kin. Kin tua Igat, di puji aku, baka log cabin geladak nuan ku aku, cute...nya alai lalu bulih nama brick log cabin setor tu tadi ahai wai...

Wednesday, April 22, 2009

Anak dara ke bebangkut & iya ke ukai indu asi indu ai

Monkeying around ba belakang Hilux....
Peda, enda kasih apai tuai ke sepiak seduai, ukai nya ka ka makai pizza, semadi ke di irit kita tiga iya ke nurun.. acih ulu..

Igat dropped a bombshell malam tu tadi, madahka diri enggai masuk matrikulasi, ka ngambi A-levels. Ala hai kassim. Tiket bilun kami tiga ke Labuan udah dibeli, hotel udah di booking, udah minta chuti...nama kebuah enggai kin? Sekeda kebuah laban nangi ninga utai ditusi dua iku petunggal iya ke baru pulai belajar din. Lingga enggau Dedek nusi sekeda jamban din nadai pintu.....ninga din suah kurang ai.....ninga enti ka makai perlu bebaris.....ninga urang selalu enchuri, enggi Lingga ulih nyimpan ba baruh bantal telipon ma tindok, enti di ayan semak pala di ambi urang...3 iti telipon Lingga dichuri urang din....nyentukka bup dichuri.....akai indai.

Nya meh tua dadi ngajar iya, anang ngembuan penangi, enti sema amat bakanya, awakka ngajar nuan chara idup ke lain agi. Enti bebaris ka makai ulih ngajar nuan pengeliat ati ku aku. Enti nyepi penusah ngambi nuan nemu ngerega penyamai. Ke beguna bulih penemu, ukai nya lama din deh, muti setaun. Pasal enchuri, anang bebai ka gari manah kin, telipon nya enda ibuh diganti baru, ku dadi. Enti lelenggau tua dadi ulih suah ngundang, ku aku ngumbuk Igat. Enti nuan mutus ka ngambi A levels nyu berengkah ari bulan satu suba ga nuan ke KL, nama ga kebuah lama diau ba rumah aja ngelamatu masau awak, ku dadi....Enda ga Igat majak udah ninga lalau tua apai iya.

Udah nya iya lalu madahka aku Lingga nusi mayuh aweks din, aweks Sabah bebajik. Igat lalu ngenyitka mata ngagai aku..gamal nuan ku aku, aku tengkuk nuan, ukai ngasuh nuan gila aweks aku ke ngasuh nuan kin, ngasuh nuan belajar. Majak Igat ngenyitka mata ngagai aku, bulih amat iya numbuhka pengirau ba ati aku......

Mami, aku tu ukai indu asi indu ai, ah!

Maie bejalai ke pengawa ke Bintulu minggu tu kemari, gaga amat iya laban ulih diau di rumah lebih seminggu kelebih agi maya Minggu Kudus tu kemari. Kami menyanak sewing-wing, naka ia pengelelak maya ngintu Triduum Paska. Malam Ari Empat Kudus nyu penuh gerija, ga naka ia pengangat. Ari Lima Pemaik penuh baru, Easter Vigil pama agi ga, chelap agi laban malam ari. Tumu pagi ari minggu ensugau dani laban missa berengkah pukul 7 pagi. Tang dalam pengelelak mayuh amat pengerindu dalam ati, ti ngujungka lelak nyu enda berasai, nyu udah nya baru isi asaika madai.

Menyadi enggau anak menyadi apai Maie enggau laki ia bisi nemuai ngagai kami maya Easter tu tadi, nya tua Maie gagau mela pemakai. Kami chapoh ketawa ninga ipar aku bejerita. Nama iya indai Ngayan, diau ba rumah panjai Ulu Dijih, enda jauh ari rumah kami. Kami menyanak rindu ninga iya bejaku laban jaku iya sigi original Iban bagi ke 3, with prominent “H”. Maie & Igat bendar ka nunda jaku indai nyebut “ngehaha” tang enda chun munyi enggi indai ku seduai.

Maya Maie ke gawa di Bintulu, iya selalu pulai tumu agi ari tua apai iya, laban iya terus pulai pengudah sida iya tembu meresa kedai nyual ubat. Sida ia operasi dataika ba Sg Asap di Bakun. Nya alai enti lemai ari tepelapik Maie lelak, kami menyanak nyendiaka pemakai ke simple aja ke di empa lemai. Igat meda akak iya bisi enda ga iya manduk lauk – tau amat Igat dikenyadi ka tua apai iya mela lemai: iya udah nemu manduk asi, manduk lauk, nya alai nyamai amat aku. Suba selalu Igat nundi aku, nuan Mi abuse aku, aku baruh umur, tu child labour tu ku iya. Eh, ku aku, ukai nya ta free deh, ga nuan tak seruran diberi wang ehsan ku aku. Nadai meh pengawa nuan besari-sari, tambah nuan enda tau enda belajar mela ngambika nemu mela diri maya ba kolej ila, ku aku. Rumah, gari kitai bisi kakak Indai Kumo ga mela ku aku. Diatu ok Igat, kemari iya manduk lamb chop, nyamai sepi aku, pandai iya nyampur marinate.

Maya Maie ke enda operasi enda ga masak, iya lalu melanja kami makai di luar. Ngelusu aku berapi, aku tu ukai indu asi indu ai Mi, ku ia. Suba maya aku nganti diri ke kereja ukai nama aku berapi ku Maie, laban aku nadai duit mai kita makai. Akai indai, ku ati ku din, betuah punya budak munyi ku laut. Aku lalu nyaut, au, rua kita menyanak ila enti di enggai mela. Eh, nemu kami deh, when the time comes I will do it, ku Maie. Au, ku ati aku din, tu laban bisi indai endur meraya. Patut selalu nyebut, Mi, I miss your cooking, ku iya. Lungkam-lungkam ga tudah aku tepeluh-peluhka diri manduk ka sida lauk. Pahai kitai kasak bala anak. Oo Tuhan, beri meh aku pengerai enggau pengaga awakka aku ulih mela bala anak enggau dadi enggau meruan.