Puji Tuhan, laban ari iring Iya kami sebilik udah ngaga pemutus, Igat ngagai UM ngambi Asasi Sains. Nya meh seminggu-minggu tu kami berundingka ni bagi ti patut enggau ke enda, sereta pia mega betanya ngagai semua bala pangan, sida ke biak enggau sida ke tuai, nyengkaum bala pangan ke ba high places. Semua madahka UM magang. Nama kebuah, bakatu ku (aku bekunsi jerita tu angka bisi sekeda kita ke mansa blog tu sama deka nemu, lalu tau dikunsi enggau bala kitai ke bukai kelebih agi kitai ke apai indai ke bisi anak nerima dua iti tawaran baka enggi Igat):-
1. UM universiti ti terubah ngadaka kursus foundation/pre-u nya alai sida ngembuan peneleba enggau pengelandik ti nyulut agi ngatur program nya dibandingka enggau matrikulasi Kementerian Pelajaran;
2. Bala pengajar ba Asasi Sains netapka tanya ba peresa tiap ujung semester lalu sida mega ngechik kertas peresa anembiak, nyengkaum sida ke ba matriukulasi. Kenu ku bala ke udah masuk dia, enti anembiak amat-amat numpuka ajar maya bala pengajar ngajar, sida deka nemu ni bagi batang ajar ke penting, bakani ku nyaut, sereta nama utai bukai ti besangkut-paut enggau ajar nya, ngambika anembiak ulih mansang ba pemereti senentang utai ti diajar nya sereta ulih ngadang ni bagi tanya ti deka pansut maya peresa;
3. Enti anembiak tulihka CGPA ti manah, sida deka diberi peluang dulu agi ari urang bukai diambi belajar ke degree ba UM, nitihka kursus ti dipilih anembiak;
4.UM ngembuan perengka ti manah agi, ga ia sigi Universiti penuh;
5. UM kira ke lebih tebuka agi runding sereta gaya pendiau, ti chun agi ba anembiak kitai ke bepengarap Kristian. Tambah mega ba kami ke Katolik, gerija semak amat, ulih bejalai kaki ari kampus (St Francis Xavier, ba Jalan Gasing);
6. UM ba KL/PJ, kena pansa belama maya tua dadi ke bejalaika pengawa kin, nya alai ulih kami suah ngundang Igat. Tambah mega bisi pejalai bilun Mas enggau AirAsia dua kali sari ari KL-BTU-KL, nyamai endur mechut enda lama enti sema kami ka kin tauka Igat pulai ke rumah;
7. Anembiak ke ngambi Asasi Sains mega bisi diberi perintah belanja, sama sebaka enggi sida ke ba matrikulasi, ia nya RM1,250 sesemester. Tu chukup kena mayar yuran tusyen enggau asrama, sereta kena bebayarka pemakai ti numbas iya. Bantu ti bakatu diberi ke semua, enda ngira sekalika anembiak nya begunaka tulung ti bakanya tauka enda.
Nya meh, udah tu, tak bepanggai ba Igat empu, enti ka bulih kursus nitihka dipilih iya, awakka iya nemu ga belajar enggau bendar. Ku aku madahka Igat, give it your best shot, tu make or break ku aku, laban program tu sigi fast tracked, timpuh ti pandak endur kita belajar, nya alai enda tau enda bulih pemutus peresa ti manah ba tiap iti semester, laban nadai endur bulih poin ari peresa bukai agi, mina dua iti nya aja. Aku ngajar Igat ngelekaka pengerindang ti tau nanggul iya ba pelajar sereta nemu magi awak ngambika utai ti patut digaga ulih gaga ba timpuh ti udah ditetapka. Enti sema Igat enda diberi kursus dentistry ila, iya minat ga ngambi engineering ku iya. Au, manah ga enti udah bakanya ku aku. Dadi udah ga nanya International Medical University, sekalika sida nerima urang ke pass Asasi Sains UM ba dentistry program sida, lalu IMU nyaut sida iya nerima, tang CGPA enda tau kurang ari 3.5. Ok Igat, we do our best ku aku, let God do the rest.
Kami tiga mupuk ke KL kena 23 hb Mei laban sida dipinta ngeripot kena 25-26 Mei.
5 comments:
sama gaga ninga berita tu...
Terima kasih wai.
Good choice. I still couldn't get over the info ... utai bala selalu kena churi ba sekula di Labuan din!! Asai ka enda peaceful aja pendiau ba sekula nya.
terima kasih wai bekunsi cerita tu engau bala ngambi meri penemu agai bala apai indai bukai esp baka aku empu ( next yr nyu masuk F5 anak) sereta sama bela gaga ninga pemujur bala nuan ( amat wai selalu aku nguna pemujur anak nuan kena meransang bala anak aku taja enda ngelala serta telaba pangan diri semina bekelala ba dunya cyber aja)
Dor,
Terima kasih. Diatu nyu udah bulih JPA scholarship, so kira enda nyadi meh ke UM.
Andan,
Manah meh enti jerita aku ulih nyadika peransang kita menyanak. Ari pengasai aku, sigi kitai apai indai ke enda tau enda be amat-amat ngiring bala anak ba pelajar. Maya baal aku agi primary dataika Form 3, agi ulih aku ngajar sida. Mungkang dibelika aku bup ke bisi exercise & past years' exam questions, lalu di test aku sida. Se agi-agi sida bedau score A1 ba tiap iti chapter, aku sigi agi ngasuh sida ngaga, ngena bup ti digaga publisher bukai.
Udah sida Form 4 aku enda nemu ngajar agi, ngarapka tuition, close monitoring, nguntrol aktiviti luar enggau mayuh TLC. Results monthly test sida enda tau enda dipeda, sida rinduka mantaika tua apai sida, laban kena ngumpul duit - kami meri sida duit ka tiap iti A ti ulih sida.
Aku besampi awakka bala anak nuan mega mujur magang. Munyi ku aku nyebut ngagai bala pangan ke semak, enti kitai apai indai ke diau di nengeri, ke bisi pengawa enda bekenanas nyengulaka anak enggau mujur,rugi amat bansa kitai, mengkang tinggal jauh belama dibandingka enggau urang bukai.
Post a Comment