Tuesday, June 8, 2010

Ah, agi belala begawai

Kami menyanak pulai ka rumah panjai kami di Dijih begawai, seminggu kami din. Taun tu kami nerima mayuh amat pengabang, pia mega kami ngabang asuh urang. Dua ari berunggu (1-2 hb) kami semina ulih ngali ka diri kira-kira pukul 11 malam.
Gambar tu patut di pos dulu sebedau gawai, itah kena meri selamat ari gawai ngagai semua...enda laun deh, bedau ngiling bidai, ujung minggu tu kami ngiling bidai.

Tua dadi gaga amat laban Maie enggau Sudan sama-sama bisi enggau begawai, semina Igat ke enda ulih laban benung exam. Nyamai amat aku sekali tu, laban bisi anak dara mela, ulih la aku nyenguk urang kin kitu enda lama, berandau, enggau urang nyimpan pulut...Pagi 31 tumu Maie dani enggau aku berengkah mela, manduk chapi, dah nya Sudan dani manduk manuk masak merah. TR nulung aku ngelulun enggau manggang. Sulu aku bara kin kitu, meresa tali api urang, meresa pam ai meh iya.. Puji Tuhan rumah kami udah bisi karan ari SESCO disambung kena 25 hb Lima. Projek ai ngena gravity feed mega udah nyadi berengkah ari 28hb Lima, projek tu diberi pangan tua dadi, Dr Richard Mani ari upis Mineral & Geosains (enti salah nama upis minta ampun au).

Indai enggau anak dara, ba ruai diri empu, maya kami serumah makai lemai 31hb Lima.
Tiga iku menyadi: Apai Nyah, Apai Maie, Apai Nyala. Sapa sigat agi?

Makai begulai malam 31.

Sida Apak Win sebilik, ba ruai sida. Tu "Ngalai" kami serumah, laban pandai belagu.

Nyu ke pemuas aku meda bala memain, bepoco-poco, aku lalu matak tiga iku indai taui kami serumah ngasuh bepantun. Bala anak sida lalu ketawa, ngumbai aku nemu milih, laban sida tiga sigi nemu bepantun. Tu ini Uchak ku bala anak, bini niang mandal TR kami.

Tu bala beramban
Tu sida ka bepoco-poco. Bala ke meda ngundi ni bagi ke pemadu pandai, nya bulih perais.

Tu limbo rock bansa ke tekalih, tubuh bukai enda tau kena semin, semina jari enggau tunjuk kaki aja.

Uchu Tony Bantin, anak apai Kubu ke biak. Ka amat nemuai asuh bilik kami laban rindu begulai enggau Sudan.

Kami besembiang bebala mayuh malam 2hb.
Belagu muji Tuhan sereta meri terima kasih ngagai Allah Taala.

Tu ba ruai kami, maya kami nyambut pengabang - sida TR Agup serumah. Di ranyai kami sida, di asuh belagu, bepoco-poco, di ulu ka anembiak kami serumah.
Jam nyu udah nyau amat, nganti pengabang ka pulai kendua menyanak duduk di ruai.

Uchu Boniface Unau nguluka bala TR Agup mansang ngerebahka ranyai.
Tu ba bilik urang di Ulu Dijih, bilik anak menyadi apai Maie.Kami ngabang kia tengah ari 1hb.

Tu bepangku bala uchu, sama ka enggau ngabang ka Ulu Dijih.

Chara baru ngaga lemang, panduk ba tin chat dulu, udah ai dalam ruas langkang nya baru naing ruas ba api. Aku enda manduk pulut, dinga bini Tuai Rumah lalu madahka iya nyangkung aku, dah mansau di anjung iya, siap udah dikerat manah-manah. Terima kasih, urang memberi, kita merasa, enda pia. Tu utai ti dikerinduka aku, adat basa, penyiru enggau diri sama diri ke agi dititihka di rumah panjai. Laban aku ke nemu sida selalu nyangkung aku upak, ngambi ruas, ngambi kayu, manggang, nya alai aku sigi ngungkupka sida kek maya Gawai. Taun tu endu Indai Lalai meri aku upak pantu.

Ku pangan aku siku, enti nadai jani sigi enda begawai. Ka best amat betangkap-betangkap kitai makai ma iya agi angat...tu di marinate aku ngena Lee Kum Kee char siu sauce, laban bala anak ka makai stail tu. Taun tu kami menyanak enda meli jani, laban diberi anak menyadi dadi sepiak tubuh pemerat 30 kg ungkup kami, kena sida sebilik meri terima kasih ngagai tua dadi ke ngadu ka bala anak iya ke sekula ku iya. Terima kasih Endu.
Ari 2 hb kami ngabang ngagai bala apai Maie di Kua, ba rumah anak petunggal iya, Henry Nabau. Tu indai Boy (bini Henry) enggau bini TR Jantang berandau enggau aku. Urang dia gagau nyendiaka pengawa melah pinang malam nya, nya kami lalu dibai urang merarau begulai enggau sida ke benung gawa.
Dadi, sepiak iya Henry Nabau enggau tisi nyin Tr Jantang.

Malam 30hb, bala indu mungkus perais kena berami 31 hb. Digaga ka Maie & Sudan kupi, kami sebuat pin bekelukau berandau datai tengah malam.


3 hb kami dibai anak menyadi apai Maie (Apai Kubu) nemuai ngagai rh panjai entua iya di Baoh, kira-kira sejam ngena kerita ari rumah kami. Jalai bebatu, bisi jalai pasir nyu semak kin baru bisi di blakin, ia ga balat bingkok.. akai dai, tak mabuk puang aku pulai mansang enda nakal begusak dalam kerita.... Mayuh amat jani dibunuh sida serumah, 40 iku, rumah mina 23 pintu aja. Sida mayuh ngambi urang ngabang, urang ke berantu semina 4 pintu aja. Aku ka kin ngambi Maie enggau Sudan meda chara urang din ngintu pengabang, meda adat basa, bekelala enggau bala kaban, meda menua urang sereta meda bakani ku urang berantu.

Sempat meda pendai urang Baoh.
Ba bilik indai Kubu. Tu sida petunggal, me ibu-ibu enggau ini Baoh - Indai Giri, ini Baoh, Julia, Maie, Kumo (Marilyn) & Sudan.